( أنا الصوباع اللى يوجعنى .. ماعالجوش .. أقطعه ) الله يرحمك يا عادل يا أدهم
جملة شهيرة لعادل أدهم ... طبعا كلنا فاكرينه وفاكرينها
ويظهر أن الحكومة بتاعتنا عجبتها الجملة دي واتخذتها مبدأ ودستور لها
- فلما الوزير يروح مدرسة ويلاقي الناظر لسه مجاش .... والحمامات وسخة.... والعيال مش جايبة الكتب..... ينقل 180 مدرس بالجملة إلى مدرسة تانية يبتليهم بيهم.... قال يعني المدرسة التانية دي ناقصة
فبدل ما عالج صوباعه.... قطعه
- ولما الوزير ما يعجبوش شكل البنات المنتقبة.... وانتشار النقاب في الشارع المصري.... ( ودي حاجة المفروض انها تعجبه لأنه وزير دين ) يقوم يطلع قرار بمنعه... من الكليات ... والجامعات .... والمدارس .... حتى في ديوان عام وزارته ( اللى هي المفروض أنهم بتوع دين أساسا ) .
فبدل ما عالج صوباعه...... قطعه
- ولما المحافظ وهو بيتمشى بليل كدا في البلد ويضرب بنطه بالمرسيدس ( اللى شاريها من جيبه طبعا ) ما تعجبوش شوية مساكن عشوائية.... مليانه بناس فوق بعض ... كل ستة في أوضة .... وعايشين من غير ميه.... ولا كهربا.... وبيعملوا بيبي في الشارع..... والعيال بتشرب كُلة
فبدل ما يعالج صوباعه .... قطعه
- ولما الوزير كل شوية يفرد إتاوة علينا إحنا الغلبانين المساكين .... اللى الواحد فينا كبيره بياخد 600 جنيه .... وطلع تلاته عين أمه علشان يجيب شقه 65 متر في مساكن مبارك ( برضه.... ما هو شريك في كل حاجة )... بعد كل دا
بدل ما يعالج صوباعه..... قطعه
- ولما الوزير المسئول عن صحتنا ..... اللى اتعدمت من المبيدات المسرطنه لما بقينا أكبر دولة عندها سرطان وفشل كلوى في العالم ..... يمنع عننا الدوا.... والعلاج..... ويورح هو ومراته يتعالجو بالملايين
فبدل ما يعالج صوباعه ..... قطعه
- ولما الوزير يقول مش هنشتري الماتشات لأنها غالية علينا ودا من باب الترفيه ... واللى عاوز الكحل يتكحل بعيد عننا ... والناس طبعا عوزة تتكحل ... يقومو يسرقوا الكحل من هنا وهناك.... وفي الاخر برضه نشوف الماتشات
فبدل ما يعالج صوباعه..... قطعه
ولو قعدت أتكلم كتير كدا ... أنا اللى هقطع صوباعي ....
إمتى بقى الدولة هتتخلى عن سياسة قطع الصوباع ... وتبدأ تعالجه.... ولا الصوباع مالوش نفس هو كمان يتعالج على نفقة الدولة !!
ليست هناك تعليقات:
إرسال تعليق