الله يرحم أيام زمان

المكان : شقتنا ال 250 متر ( ايجارها 5 جنيه )
الزمان : 1978
المناسبة : نهائي كاس العالم
الساعة دلوقت 4 ونص الباب بيخبط ... جري ع الباب افتح ... بابا بابا
أهلا حماده ... عامل إيه
كويس
بيقلع بابا الجاكت ... استنى يا سي بابا

إيه ؟
أنا عاوز تلفزيون !!
تلفزيون ( علامة استغراب ودهشة )
ليه ؟ مش أنت بتتفرج عند خالتك ؟
أيوه يابابا .. بس سعيد بيرخم عليا وبيغظني وبيقول لي : خلي أبوك يجيبلكم تلفزيون
بس أنا كسبته في الشيكات ( الشيكات دي : عبارة عن ورق الشيكولاتا . كنا بنلعب بيها ملك وكتابة ) .
طيب .. نتغدى ونشوف الموضوع دا
تؤ تؤ تؤ
يلا يابا يلا يا بابا ( مع خبط في الارض بنرفزة )
ماشي يا سي حمادة .. طب روح البس يلا
وعند شركة عمر افندي وقدام الفاترينا وقفت اختار بين التلفزيونات
ودخلنا .. زشاورت على تلفزيون كبيييير أوي
17 بوصة سانيو
عجبك دا يا حماده ؟
أيوه يا بابا
ب كام التلفزيون دا ؟
150 جنييه يا فندم
مبسوط يا سي حماده
مبسوط أوي يا بابا ( امووووه ) بوسه كبيرة اوي
هو الماتش هـ يجي امتى ؟
بليل
طب يلا نروح بقى علشان تلحقه
ولا أقولك تعالى نجيب لحمة
اوزن يا معلم كيلو وشفيه وما تنساش تحط حتة دهنة وماسورتين كدا ولا حاجة
عني يا بيه
كام يا معلم ؟
جنيه ونص يا بيه
اتفضل
حنطور استنى يا سطى
ايوه هنا
خد ( 5 صاغ ) .
ايه دا أستاذ حامد ؟ تلفزيون ؟ الف الف مبروك .
الله يبارك فيك يا حاج عبد السميع .
ايدك بس معايا ندخله الشقه
الغدا يا عيال
غدا ايه ... شغله الاول بقى ماليش دعوه
يا حماده نتغدى بقى الاول
لالالالا
مبسوط كدا يا بابا اهو الشوط الاول خلص
اتفرج بقى ع الاعلانات لغاية ما يجي الشوط التاني
لالا روح هات باكو سافو وعلبة سجاير نفرتيتي وتعالى لغاية ما الشوط التاني بدأ
طيارة
بس بقى الماتش بدا
( تركيز عالى اوي )
هي هي هي هي
ايه يا حماده فيه ايه
الارجنتين غلبت يا بابا هولندا وخدت كاس العالم
وريني كدا الجون
يا بابا اظبط التلفزيون مش عارف اشوف حاجة
من الخطوط السوده دي اللى طالعة نازلة
هو يا بابا لون فانلة الارجنين ايه ؟
والله يا حمادة مش عارف
بس هو فريق فانلته فتحة والتاني غمقة
الله يرحم زمان
وأيام زمان
ويرحم كيلو اللحمة أبو جنيه ونص
والشقة ال 250 متر ب 5 جنيه
والتلفزيون ال 17 بوصة ب 150 جنيه
ويرحم بابا اللى جاب لي كل حاجة حلوة